Halldór Jörgen Olesen heldur úti Verðbólguvaktinni á verdbolga.net þar sem hann birtir greiningu á samsetningu verðbólgunnar og gerir verðbólguspár 12 mánuði fram í tímann. Að undanförnu hefur hann sett inn talsvert af upplýsingum sem snúa að ýmsum samanburði milli Íslands og evrusvæðisins og samanburðurinn er sláandi óhagstæður fyrir Ísland og krónuna. Halldór er gestur Ólafs Arnarsonar í hlaðvarpi Eyjunnar.
Hér er hægt að hlusta á brot úr þættinum:
Þú hefur haldið úti vefsíðunni verðbólga.net og þar hefurðu verið að birta mikið af áhugaverðum upplýsingum sem tengjast Evrópusambandinu og mögulegri aðild Íslands að Evrópusambandinu. En þú ert líka með svona kosningaspá fyrir komandi þjóðaratkvæðagreiðslu.
„Jú, jú, það er rétt. Ég var nú bara að uppfæra spána áðan og þetta er eins og komið hefur fram mjög mjótt á mununum. Spáin mín er 51,9% fyrir já-inu og síðan 48,1 fyrir nei. Þetta er tæpt.“
Þetta er tæpt og hefur verið það. Í flestum könnunum hefur já-ið verið ofan á, en með litlum mun.
„Já, það er svona hallað á já-ið en það hefur aldrei verið nein afgerandi forysta. Þetta hefur bara verið mjög jafnt. Þetta eru tvær fylkingar, þetta eru einföld svör, já og nei, og eru þetta bara tveir hópar sem að auðvitað bera hag Íslands fyrir brjósti. Báðir þessir hópar gera það en það er bara spurning um hvaða leið á að fara.“
Og þú hefur verið að birta á síðunni upplýsingar, talnaupplýsingar meðal annars, og þú vitnar í heimildir og þú ert ekki að slá þarna fram einhverjum fullyrðingum, þú ert að setja þarna fram hluti sem eru gögn á bak við.
„Jú, jú, það er rétt og það er smá saga á bak við það og titillinn á síðunni gefur það frá sér. Að þetta heitir Verðbólguvaktin, verðbólga.net. Þetta bara hófst þannig að það koma alltaf út verðbólgutölur í hverjum mánuði og svo sá maður hinar mismunandi túlkanir á verðbólgutölunum. Og það er svo merkilegt að fólk er að lesa sömu tölurnar en síðan dvelja á mismunandi punktum og segja verðbólgan er út af þessu og út af hinu. Mér fannst þetta satt að segja ákaflega skrýtið vegna þess að þetta eru bara hreinar tölur og þær eru allar eins fyrir framan augu allra annarra. Þannig að þetta hófst eiginlega á því að ég vildi bara greina hvaðan verðbólguþrýstingur væri að koma og hvað væri að drífa hann áfram og hvað væri að halda henni niðri, hvort þetta væru innlendir þættir eða hvort þetta væri gengið eða hvort þetta væri eitthvað annað og þetta er það sem ég birti reglulega, mánaðarlega, þá birti ég sem sagt yfirlit yfir verðbólguna og hvaðan hún er að koma. Og svo birti ég líka spá 12 mánuði fram í tímann.
Og hvernig er útlitið?
„Já, útlitið, við erum með 5, 3% verðbólgu núna og ef spá mín er marktæk þá lítur það þannig út að við gætum komist undir 5% í janúar 2027. Og þessa þrjá mánuði sem ég hef birt þessa spá þá hef ég bara verið ansi nærri lagi, ég er ekkert voðalega mikið verri heldur en bankarnir.“
Já, já, en ég hef tekið eftir því að þú hefur verið að birta tölur og upplýsingar og fjalla um atriði sem tengjast aðild Íslands að Evrópusambandinu. Ertu til í aðeins að fara með okkur í gegnum þetta?
„Já, þetta er í raun og veru bara sama hugsunin og með verðbólguna, flestir hlutir sem tengjast okkar aðild er hægt að rannsaka og finna gögn sem styðja hin mismunandi sjónarmið. Og núna þegar við erum að ræða aðildina og það er verið að reka áróður fyrir bæði já og nei, þá gerist það sama eins og þegar menn eru að túlka verðbólguna. Þeir dvelja á einhverjum einum og tveimur þáttum sem eru kannski ekki aðalatriðið eða setja þá í fókus og brennidepil. Þannig að ég hef verið að reyna að fara þennan gullna meðalveg að styðja í raun og veru sem sagt mínar umfjallanir með gögnum eins mikið og hægt er. Og þar kemur náttúrlega ýmislegt í ljós. Ýmsar fullyrðingar í dag eru í raun og veru ekki beinlínis rangar þó einhverjar séu þar en þær eru kannski svona hálfsannindi eða eitthvað slíkt, það er greinilega verið að reyna að búa til tvo hópa og það er reynt að safna í trúfélögin tvö, já og nei, og svo bara trúa menn mismunandi miklu en þetta á nefnilega ekki að snúast um trú, þetta á að snúast um staðreyndir og það sem hægt er að kanna og hægt er að sannreyna. Þannig hef ég reynt að nálgast þetta og mér verður örugglega líka á í því, það er hægt að gera mistök í því, en reyni eftir fremsta megni að mála þá mynd sem byggð er á staðreyndum.“
Hægt er að hlusta á hlaðvarpið í heild sinni hér:
Einnig er hægt að hlusta á Spotify.
