Við erum að taka fast á málefnum varðandi innflytjendur og viljum að það sé sjáanlegt að hér ríki festa og að við höfum yfirlit og eftirlit með hlutunum. Lausung í þessum málum bitnar fyrst og fremst á þeim sem standa veikast. Hluti af þessu er að efla lögregluna sem í auknum mæli þarf að kljást við vopnaða brotamenn.

Við erum að herða tökin á innflytjendamálum og afnema séríslenskar reglur sem hafa verið miklu linari en reglur í nágrannalöndum okkar. Við erum ekki með kröfu um að fólk sem fær dvalarleyfi hér á landi geti séð sér farborða eins og krafist er í öllum nágrannalöndum okkar. Þetta gengur ekki lengur.

Það eru 20 skipulagðir glæpahópar starfandi á Íslandi, hópar sem í eru bæði Íslendingar og útlendingar og starfa í fleiri en einu landi. Mikilvægt er að sameina lögregluembætti, fækka þeim og efla, m.a. til að lögreglan geti ráðið við þessa nýju stöðu.

Það er mikil leikjafræði í gangi varðandi kjarasamninga hverju sinni og svo er eflaust líka núna, þegar lítill tími er til stefnu til að bjarga kjarasamningum á almennum vinnumarkaði. Stóra málið núna hlýtur að vera að tryggja öllum húsnæðisöryggi. Þar stendur m.a. upp á sveitarfélögin.

Umræðan í aðdraganda þjóðaratkvæðagreiðslunnar um framhald aðildarviðræðna við ESB einkenndist af upplýsingaóreiðu og langt frá því að hún snerist um kjarna málsins.

Það er alvarleg þróun fyrir hina lægra launuðu að gerðar skuli breytingar á gjaldtöku fyrir leikskólavist sem fela í sér að hann sé jafnvel ókeypis fyrir þá sem þurfa ekki að hafa börnin þar allan vinnudaginn á meðan gjaldið hækkar verulega á þá foreldra sem þurfa að nýta sér allan daginn.

Það er vanvirðing við fólk sem hefur verið að vinna mikilvæg störf hjá hinu opinbera, t.d. í viðkvæmum umönnunar og endurhæfingarstörfum, þegar gerðar eru skipulagsbreytingar með fjöldauppsögnum og látið að því liggja að engin þjónusta skerðist við þær uppsagnir, eins og fólkið hafi ekkert verið að gera.

Vaxtatækið virðist vera eina vopnið við verðbólgu. Það slær á eftirspurn en það þarf ekki að slá á eftirspurn hjá hópnum sem nær ekki endum saman. Þessi hópur er alltaf í kringum 30 prósent og býr við skilgreinda fátækt.

Það er mikilvægt að fá kennara að borðinu þegar verið er að endurskoða og endurskipuleggja skólastarf. Kennarasamfélagið er almennt jákvætt í garð þeirra breytinga sem Inga Sæland er að beita sér fyrir. Nú er verið að innleiða einkunnagjöf í tölum og verður hún að fullu innleidd við útskrift 10. bekkinga í vor.

Inga Sæland óskaði eftir því að uppbygging hjúkrunarheimila fylgdi henni yfir í menntamálaráðuneytið vegna þess að annars hefði töf komið á það mál. Henni geðjast ekki að því að talað sé um eldra fólk sem „fráflæðisvanda“. Við fáum á þriðja undrað hjúkrunarrýma í notkun á næsta ári og annað eins árið 2028.

Síðasta ríkisstjórn jók ríkisskuldir um 866 milljarða á sjö árum og ríkisstjórn Kristrúnar Frostadóttur fékk þá skuldasöfnun í fangið. Samstaðan í þessari ríkisstjórn er órofa og ef flokkarnir eru ekki sammála um eitthvert mál setjast valkyrjurnar niður og ræða málin til lausnar. Yfirleitt tekur það mínútur, innan við klukkustund.

Þangað til útborgaðar bætur til þeirra sem lakast hafa það, öryrkja og aldraðra, ná 450.000 krónum verður borgaður út jólabónus til þessara hópa. Í fyrra nam hann 74.000 krónum. Þar sem ekki eru til ótakmarkaðir peningar var ákveðið að greiða bónusinn ekki til þeirra sem búa erlendis og hafa lögheimili og heimilisfesti þar.