Þórsmörk ehf., móðurfélag Árvakurs hf., útgáfufélags Morgunblaðsins og fleiri félaga tengdum rekstri Morgunblaðsins, tapaði 346 milljónum á síðasta ári. Árið 2024 nam tapið um 349 milljónum, þannig að á þessum tveimur árum hefur Morgunblaðið tapað um 700 milljónum.
Í byrjun júní var hlutafé í Þórsmörk ehf. aukið um 600 milljónir og orðið á götunni er að sú hlutafjáraukning hafi komið rétt í tæka tíð til að dekka tapið. Ef það þá dugði til vegna þess að í árslok 2024 skuldaði Árvakur móðurfélaginu 384 milljónir.
Orðið á götunni er að langlundargeð eigenda Morgunblaðsins sé aðdáunarvert. Nánast á hverju einasta ári þurfa eigendurnir, sem að uppistöðu eru sægreifar í Vestmannaeyjum og norðan heiða, að dæla hundruðum milljóna inn í blaðið.
Fljótlegt yfirlit með einfaldri aðstoð Google gefur til kynna að hlutafé Árvakurs hafi verið aukið um 400 milljónir króna árið 2017. Árið 2019 var hlutafé aukið um 300 milljónir. Þá var hlutafé Þórsmerkur aukið um 300 milljónir árið 2020. Við þetta bætast 267 milljónir sem hluthafar settu inn árið 2024 og svo 600 milljónirnar á þessu ári. Ugglaust er um fleiri innspýtingar að ræða en þetta er það sem skyndileit hjá Google leiddi í ljós. Samtals eru þetta 1.567 milljónir að nafnvirði. Mikil breyting hefur orðið á eignarhlut einstakra hluthafa á þessu tímabili og er Guðbjörg Matthíasdóttir í Vestmannaeyjum nú orðin ráðandi í eigendahópnum með ríflega helmingshlut bæði beint og óbeint, en einnig er Kaupfélag Skagfirðinga sterkt með um fimmtung.
Ef innspýting hluthafa í rekstur Morgunblaðsins er reiknuð til núvirðis kemur í ljós að eigendurnir hafa á síðustu tíu árum lagt Morgunblaðinu til sem svarar tveimur milljörðum að núvirði. Áður hafði ríkisbanki afskrifað lán til eigenda Morgunblaðsins upp á 11-12 milljarða króna að núvirði.
Orðið á götunni er að sægreifunum, eigendum Morgunblaðsins, þyki þetta ásættanlegur herkostnaður en helsta hlutverk Morgunblaðsins frá því núverandi eigendahópur komst yfir blaðið hefur verið að halda úti miklum og hömlulausum áróðri í þágu eigenda sinna. Morgunblaðið berst fyrir því að stórútgerðin þurfi sem minnst, helst ekkert, að greiða fyrir aðgang að gríðarlega verðmætri þjóðarauðlind. Skemmst er að minnast yfirgengilegs áróðurs blaðsins um leiðréttingu veiðigjalda í fyrra.
Þá er ljóst að Morgunblaðið beitir sér nú af miklu offorsi til að reyna að hræða kjósendur frá því að samþykkja áframhald aðildarviðræðna við ESB og sést ekki fyrir í þeim efnum. Orðið á götunni er að einhvern tíma hefði samlíking við fimmtu herdeildina verið notuð yfir framgöngu helstu forkólfa þeirrar umfjöllunar, en sumir blaðamenn blaðsins virðast staðráðnir í því að virkja sem flesta Evrópuleiðtoga til fullrar hörku gegn hagsmunum Íslands komi til aðildarviðræðna í kjölfar þjóðaratkvæðagreiðslunnar 29. ágúst nk.
Orðið á götunni er að mjög greinilegt sé að hagsmunir íslensks almennings og sægreifanna sem beita Morgunblaðinu fyrir sig í ósvífnum og tilbúnum hræðsluáróðri gegn mögulegri aðild Íslands að ESB fari engan veginn saman. Á meðan Ísland er utan ESB eru sægreifarnir inni í evruhagkerfinu og borga 70% lægri vexti en þeir sem eru fastir hér í krónuhagkerfinu. Það gefur evruelítunni mikið og gott forskot. Gróðinn af því forskoti er svo mikill að tveir milljarðar í botnlausa hítina í Hádegismóum á einum áratug er eins og dropi í hafið fyrir þetta fólk.
