Það er tilvalið að bjóða þínum nánustu í páskabröns og njóta þess að eiga góð stund saman. Ekki er verra að grípa í spil, fela marglit páskaegg í garðinum eða búa til heimagert bingó eftir matinn.
Morgunsnittur með avókadó og steiktu beikoni
1 baguettebrauð
Ólífuolía
4 egg
2 avókadó
Safi úr
½ sítrónu
Salt og pipar
1/3 rauðlaukur
150 g beikon
2 msk. fersk steinselja
Ferskur parmesanostur
Aðferð
Hrærið saman egg á pönnu og kryddið með salti og pipar, myndið eggjahræru og setjið til hliðar.
Setjið beikon sneiðar á bökunarpappír og inn í ofn við 180 gráður í um 25-30 mínútur þannig að beikonið verði stökkt og gott.
Stappið avókadó í skál með klípu af salti og safa úr ferskri sítrónu.
Skerið rauðlauk í þunnar sneiðar.
Skerið brauðið í sneiðar og penslið með ólífuolíu og setjið inn í ofn í 4-5 mínútur við 180 gráður.
Setjið eggjahræru, stökkt beikon, avókadó, sneiðar af rauðlauk, ferska steinselju yfir og rífið að lokum ferskan parmesanost yfir.
