Vilhjálmur Birgisson, formaður Verkalýðsfélags Akraness, segir sífellt ljósara að forsendur kjarasamninga séu við það að bresta, líkurnar á forsendubresti séu nánast öruggar.
„Þegar samningarnir voru undirritaðir tók íslenskt verkafólk á sig afar hófstilltar launahækkanir. Það var gert af ábyrgð og með það að markmiði að stuðla að lægri verðbólgu og þar með lægri vöxtum til hagsbóta fyrir heimilin í landinu,“ segir Vilhjálmur í færslu á Facebook. „En það var aldrei ætlunin að verkafólkið bæri þessa byrði eitt.“
Við undirritun kjarasamninga hafi verið skýrt að allir þyrftu að leggjast á árarnar.
„Ríki og sveitarfélög áttu að sýna aðhald í gjaldskrárhækkunum. Fyrirtæki í verslun og þjónustu lýstu því yfir að þau myndu halda aftur af verðhækkunum og leggja þannig sitt af mörkum til að ná niður verðbólgu. Nú blasir önnur mynd við.“
Vísitala neysluverðs hækkaði um 0,94% milli mánaða og mælist nú ársverðbólga 5,2%.
„Opinber gjöld hafa hækkað og víða hafa verðhækkanir í verslun og þjónustu farið langt umfram það sem verkafólk hafði ástæðu til að vænta þegar það samþykkti hófstillta kjarasamninga,“ segir Vilhjálmur.
„Það er því erfitt að komast að annarri niðurstöðu en þeirri að íslenskt verkafólk hafi staðið við sinn hluta samkomulagsins en aðrir ekki.“
Ef það sé ætlast til þess að launafólk sýni ábyrgð og hófsemi þá þurfi atvinnulífið og hið opinbera að gera slíkt hið sama. „Annars verður ómögulegt að byggja upp það traust sem þarf til að gera langtímasamninga í framtíðinni.“
