Skosku bræðurnir Olly og Seb Fisher gætu skrifað söguna með landsliðum Úganda.
Bræðurnir, sem eru 18 og 16 ára og leika með Partick Thistle, eiga rétt á að spila fyrir Úganda þar sem móðir þeirra fæddist í landinu. Talið er að þeir yrðu fyrstu hvítu leikmennirnir til að spila fyrir Úganda.
Olly, sem er markvörður, og Seb, sem er framherji, fengu boð í æfingabúðir U-20 og U-17 ára landsliða Úganda í ágúst og hafa undanfarna daga æft með liðunum.
Olly vonast til að spila með Úganda á Afríkumóti U-20 ára liða á næsta ári en Seb gæti farið með U-17 ára liðinu á HM í Katar í nóvember.
Laryea Kingston, fyrrum leikmaður Hearts í Skotlandi er þjálfari U-20 ára landsliðs Úganda.
