Ludek Miklosko, fyrrverandi markvörður West Ham og QPR, er látinn 64 ára að aldri eftir baráttu við krabbamein.
Miklosko greindist með krabbamein árið 2021 en ákvað að hætta meðferð í desember 2024. Skömmu síðar mætti hann á leik West Ham gegn Liverpool þar sem stuðningsmenn klöppuðu honum lof í lófa.
Tékkinn lék tæplega 400 leiki fyrir West Ham á árunum 1990 til 1998 og var í miklu uppáhaldi á meðal stuðningsmanna. Hann sneri síðar aftur til félagsins sem markmannsþjálfari.
„Pabbi elskaði einfaldlega West Ham og sérstaklega að heyra nafnið sitt sungið hátt og skýrt á hverjum leik,“ segir Martin Miklosko, sonur hans.
Miklosko er meðal annars minnst fyrir frábæra frammistöðu gegn Manchester United í lokaumferð ensku úrvalsdeildarinnar árið 1995. West Ham gerði þá 1-1 jafntefli og kom í veg fyrir að United yrði meistari, en Blackburn vann titilinn það ár.
Miklosko lék einnig 57 deildarleiki fyrir QPR áður en hann lagði hanskana á hilluna árið 2001. Hann lék alls 42 landsleiki fyrir Tékkóslóvakíu og síðar Tékkland.
