Minningarsjóður Einars Darra kom færandi hendi á sjúkrahúsið Vog og fíknigeðdeild Landspítalans á aðfangadag og færði öllum sjúklingum og starfsmönnum jólagjöf.

„Það gaf okkur gott í hjartað að gefa af okkur á þessum fallega degi sem í senn getur verið virkilega erfiður fyrir marga,“ segja aðstandendur Minningarsjóðs Einars Darra. „Við erum þar engin undantekning enda fyrstu jólin án Einars Darra okkar.

Höldum áfram, kæru Íslendingar, að standa saman á komandi árum, í sameiningu getum við látið stóra hluti gerast. Ég á bara eitt líf og þú líka.

Á heimasíðu SÁÁ segir að um 60 einstaklingar eru í meðferð á Vogi yfir hátíðarnar og þar er hlýleg og góð jólastemming. Á aðfangadag var boðið upp á tónlistaratriði og eins og fyrri ár fengu allir bók í jólapakka á aðfangadagskvöld.

SÁÁ þakkar Minningarsjóði Einars Darra kærlega fyrir góðar gjafir og óskar landsmönnum öllum gleðilegra jóla.