Ég var nýlega að ræða við ástvin um hvað það þýddi að hafa átt innihaldsríkt líf. Hann kvaðst þakklátur fyrir að hafa búið á Íslandi og fengið tækifæri til að ferðast og upplifa alls konar hluti sem fólk í fátækari löndum gæti ekki leyft sér. Ég jánkaði því, að sjálfsögðu. Þetta er falleg hugsun.

Líf okkar snýst að svo stóru leyti um langanir. Oft langar okkur í hluti sem við þurfum og stundum langar okkur í hluti sem skaða okkur. Fíklar biðja oft um líkn frá löngun á meðan aðrir biðja um eða bíða eftir löngun til þess að taka skrefið og byrja í ræktinni, hætta að drekka orkudrykki, taka kókaín eða fá heimsent áfengi á virkum dögum.