Fjölmiðla- og athafnamaðurinn Siggi Hlö hefur sent frá sér færslu þar sem hann varar íslenska áhugamenn um enska boltann um að kaupa miða á leiki af þarlendum svikahrappi. Siggi hefur um árabil skipulagt ferðir og útvegað miða á leiki Manchester United enda einn harðasti stuðningsmaður liðsins hér á landi. Fyrir nokkrum árum lenti hann hins vegar í klóm svikahrapps.
„Maðurinn á þessari mynd heitir Phil Jones. Hann skuldar fyrirtæki mínu 4.000.000 (fjórar milljónir). Hann sveik okkur rétt fyrir Covid,“ skrifar Siggi á stuðningsmannasíðu Manchester United á Íslandi.
Segir útvarpsmaðurinn vinsæli að lögmenn séu að vinna í málinu og hafi hann ekki viljað vera að gaspra opinberlega um málið. Honum hafi hins vegar runnið blóðið til skyldunnar þegar hann frétti af því að Jones væri enn að svíkja Íslendinga.
„Ekki bara stuðningsmenn Man Utd heldur líka Liverpool og fleiri liða,“ skrifar Siggi og hvetur lesendur til þess að dreifa tilkynningunni „eins og vindurinn“.
„Þetta á ekki að líðast. Alls ekki versla við þennan mann,“ segir Siggi að lokum.
