Það hafa heyrst margar óánægjuraddir með skipulag heimsmeistaramótsins í knattspyrnu í Katar. Bjórumræðan til að mynda hávær enda hafa gestir HM verið vanir að geta hellt mjöð í sig að vild á fyrri mótum.

Skortur á bílastæðum fyrir rútur við leikvelli, skortur á merkingum við almenningssamgöngur svo og á sjálfum leikvöllunum hafa ruglað gesti í ríminu.

Margir segja að yfirvöld hafi hafið undirbúning allt of seint enda hefur ríkið aldrei tekist á við viðburð af þessari stærðargráðu. Íbúar í Katar eru aðeins tæpar þrjár milljónir en gestir HM eru ein milljón.  Þrátt fyrir að eyða gríðarlegum fjárhæðum í undirbúning, meðal annars með byggingu nýrrar borgar, er margt sem ekki náðist.

Til að mynda að tryggja húsnæði undir alla gestina en það var á endanum ljóst að það myndi aldrei takast í tíma.

Því var gripið til ýmissa aðgerða, meðal annars að búa til ,,þorp” gáma á einhverju sem virðist hafa verið bílastæði. Og þótt að mótið sé hafið eru verkamenn enn að koma upp gámum.

Blaðamaður á vegum breska blaðsins The Sun fékk inni í einum slíkum gámi og segir ekki farir sínar sléttar.

Í hverjum gámi er eitt rúm, náttborð, salerni, vaskur og sturta, og kostar aðstaðan 175 pund á nótt eða rétt tæplega 27 þúsund krónur íslenskar.

Það er gat á einum veggnum hugsað var fyrir loftræstkerfi en verkið var ekki klára og stóð loftræstigræjan ótengd á gólfi gámsins. Hitinn í gámnum fer upp í 40 gráður og kvörtuðu margir viðmælendur og nágrannar blaðamannsins yfir að geta ekki sofið vegna hita.

Blaðamanninum tókst þó að koma græjunni af stað en hávaðinn er óbærilegur og fer hitinn aldrei niður fyrir 31 gráður.

Vatnið í sturtunni er brúnt og sjóðandi heitt.

Það er fátt um fína drætti hvað mat varðar en þó var hægt að fá litla pepperoni pizzu. Það voru fjórar sneiðar af pepperoni á  pizzunni sem kostar um 2500 krónur íslenskar, sem Bretum finnst út úr kú.

Það er aftur á móti hin fínasta ísbúð við svæðið og er hún mikið sótt af sveittum íbúum gámanna sem að mestu sætta sig við aðstæður.

Þetta er jú HM.