Erik ten Hag, knattspyrnustjóri Manchester United fær enn meira svigrúm til þess að koma handbragði sínu á liðið í gegnum félagsskiptagluggann eftir nýjustu fregnir frá félaginu um brotthvarf nokkurra leikmanna. Búist er við því að um 50 milljónir punda losni með því að koma kostnaði, við laun þeirra leikmanna sem búist er við að yfirgefi félagið, frá.

Framundan eru miklar breytingar á leikmannahópi Manchester United eftir dapurt tímabil. Erik ten Hag var ráðinn inn og mun fá mikið frelsi til þess að setja sitt handbragð á það hvernig lið Manchester United mun líta út næstu tímabil. Nýjustu fregnir frá breska vefmiðlinu Mirror herma að 50 milljónum punda losni hjá Manchester United hvað launakostnað varðar gangi áætlanir félagsins um brotthvarf leikmanna eftir.

Þetta kemur að mestu til vegna brotthvarfa nokkurra leikmanna úr hópi Manchester United. Munar þar miklu á launakostnaði sem hverfur vegna nýtilkynntra brotthvarfa Paul Pogba, Juan Mata sem og Jesse Lingard.

Þá hefur Lee Grant kvatt Old Trafford, Nemanja Matic hefur ákveðið næstu skref án Manchester United og Edinson Cavani er á förum frá félaginu. Þá eru uppi vangaveltur um framtíð leikmanna á borð við Aaron Wan-Bissaka, Phil Jones, Eric Bailly, Axel Tuanzebe sem og Anthony Martial sem hefur ekki tekist að heilla á láni hjá Sevilla.

Þrátt fyrir að margir hverjir af þessum leikmönnum verði ekki seldir fyrir stórar upphæðir greinir Mirror frá því að stórt bil myndist með lækkandi launakostnaði fyrir Manchester United til þess að athafna sig betur á félagsskiptamarkaðnum.