Ekki öll félög sem standa við gerða samninga – Skulda oft marga mánuði
Leyfiskerfi KSÍ er hlutur sem félög í efstu deild karla og 1. deild karla þurfa að gangast undir. UEFA ákvað að öll félög sem taka þátt í Evrópukeppni frá og með haustinu 2004 skyldu hafa útgefið leyfi frá knattspyrnusambandi sínu. Í kerfinu verða félög að mæta lágmarkskröfum UEFA á fimm sviðum.
Knattspyrnusamband Íslands ákvað í kjölfarið að taka upp leyfiskerfi í efstu deild 2003 þannig að þau félög sem ynnu sér rétt til að leika í Evrópukeppni hefðu tilskilið leyfi KSÍ. Fyrir keppnistímabilið 2007 var leyfiskerfið síðan útvíkkað, þannig að það náði einnig til 1. deildar og undirgangast nú tvær efstu deildir Íslandsmóts karla kerfið. Leyfiskerfið á að gera félögum kleift að bæta skipulag sitt samkvæmt viðurkenndum lágmarksviðmiðum, gera fjármál íþróttarinnar sýnilegri sem ætti að leiða til aukinnar tiltrúar fjárfesta og meiri fjárfestinga utanaðkomandi aðila í íþróttinni, og bæta öryggi og ánægju áhorfenda á leið til leiks, meðan á leik stendur og að honum loknum.
Galli virðist hins vegar vera í kerfinu þegar kemur að fjármálum og því hvernig félög standa skil á gerðum samningum. Til að fá keppnisleyfi á hverju ári þarf lið í Pepsi-deild karla og 1. deild karla að fá alla samningsbundna leikmenn til að skrifa undir bréf þar sem leikmaður staðfestir að félagið hafi staðið við gerða samninga, að félagið hafi greitt öll laun og bónusa og að leikmaður eigi ekkert inni hjá félaginu. Undir þetta skrifa hins vegar leikmenn þrátt fyrir að félög í báðum deildum skuldi þeim fjármuni. Félagið biður leikmenn um það svo að það haldi keppnisleyfi sínu hjá KSÍ. Ekki þarf að leggja fram nein frekari gögn en staðfestingu leikmanns um að enginn vanskil séu til starfsmanna.
Í dag ríkir góðæri á Íslandi og knattspyrnufélög hér á landi hafa tekið þátt í því, sum hafa hins vegar spennt boga sinn of hátt og geta ekki staðið við skuldbindingar. Sum félög í Pepsi-deild karla skulda til að mynda leikmönnum sínum margra mánaða laun. DV ræddi við nokkra leikmenn í deildinni sem hafa verið í þessari stöðu síðustu ár. Þeir hafa skrifað undir að félagið skuldi þeim ekkert þrátt fyrir að svo sé, félagið lofar að greiðslur berist innan tíðar en ef leikmaður neitar að skrifa undir getur félagið misst keppnisleyfi sitt á komandi leiktíð. Leikmenn gera þetta oft í góðri trú um að fjárhagur félagsins verði betri og hægt verði að standa við gerða samninga, einn leikmaður sem skipti um félag í Pepsi-deildinni í vetur hefur til að mynda ekki fengið laun sem hann átti inni hjá sínu gamla félagi þrátt fyrir að nú séu fimm mánuðir frá því að hann yfirgaf félagið. Leikmenn skrifa hins vegar undir svo félag þeirra fái keppnisleyfi.
Haukur Hinriksson er lögfræðingur hjá KSÍ og sér um leyfiskerfið. „Það þarf að koma staðfesting frá félögum um að engin vanskil séu við starfsmenn þeirra. Fyrir fund leyfisráðs skila ég inn gögnum um það og þá með athugasemdum ef við á. Félögin þurfa að sýna staðfestingu á þessu og gera það á mismunandi hátt. Það eru leikmenn sem hafa haft samband við mig og spurt út í þetta, ég segi þeim að kvitta ekki undir ef eitthvað vantar. Félögin hafa út mánuðinn til að skila gögnum,“ sagði Haukur um málið þegar DV leitað til hans.
Þrátt fyrir að sum félög séu að spenna boga sinn allt of hátt eru flest félög í deildunum tveimur sem standa við gerða samninga, heimur fótboltans á Íslandi hefur breyst en hér áður fyrr treystu leikmenn ekki eins mikið á tekjur frá knattspyrnufélögum. Oftar en ekki var um að ræða aukapening og leikmenn voru yfirleitt í starfi, í dag eru hins vegar breyttir tímar þar sem margir leikmenn eru aðeins í starfi sem fótboltamenn og treysta því á laun frá félögum til þess að borga reikninga.
Leyfiskerfi KSÍ tekur mið af lágmarkskröfum UEFA nema þar sem UEFA hefur samþykkt undanþágu, en undanþága er aðeins veitt til eins árs í senn.
Með leyfiskerfi í efstu tveimur deildum Íslandsmóts meistaraflokks karla er leitast við að ná fram ákveðnum markmiðum.
Mælanleg markmið eru sett á ári hverju í tengslum við árlegt endurmat.
Með Leyfiskerfi KSÍ (og Leyfiskerfi UEFA) leitast UEFA og KSÍ við að ná eftirfarandi markmiðum:
a) Að efla frekar og auka sífellt gæði á öllum sviðum knattspyrnunnar á Íslandi (og í Evrópu), ásamt aukinni áherslu á uppeldi ungra leikmanna.b) Að tryggja framvindu Evrópukeppna félagsliða yfir keppnistímabilið.c) Að fylgjast með því að sanngirni og heiðarleiki hvað varðar fjármál sé hafður að leiðarljósi í mótunum.d) Að þróa samræmd viðmið fyrir félagslið hvað varðar fjárhagslegar, knattspyrnulegar, lagalegar, starfsmannahaldslegar, stjórnunarlegar og mannvirkjalegar forsendur um alla Evrópu.e) Að tryggja að stjórnun og skipulag hvers félags sé traust.f) Að bæta knattspyrnumannvirki félaga til að sjá leikmönnum, áhorfendum og fulltrúum fjölmiðla fyrir vel búnum, vel staðsettum og öruggum leikvöngum, sem henta fyrir íslenskar aðstæður.g) Að efnahagsleg og fjárhagsleg geta félaga batni, gegnsæi og trúverðugleiki þeirra aukist, og nauðsynleg áhersla sé lögð á að félögin standi skil á skuldbindingum sínum.
