„Markmið mitt núna er að styrkjast og bæta mig sem leikmaður,“ segir hinn sextán ára gamli Robert Bobroczky sem búsettur er í Ohio í Bandaríkjunum.
Óhætt er að segja að þessi sextán ára piltur veki athygli hvert sem hann fer. Hann er 231 sentímetri á hæð og það þrátt fyrir að vera aðeins sextán ára gamall og mögulega enn að stækka.
Robert spilar körfubolta með Grand River Academy-skólanum í Ohio og þykir efnilegur og vel nothæfur leikmaður – ekki síst í ljósi þess hversu hávaxinn hann er.
Robert er fæddur og uppalinn í Rúmeníu en þegar hann var fjórtán ára gamall flutti fjölskylda hans til Ítalíu til að hann fengi betri þjálfun sem körfuboltamaður. Foreldrar hans vildu að Robert tæki næsta skref á ferli sínum og töldu að hagsmunum hans væri best borgið í Bandaríkjunum þar sem hann fengi góða þjálfun auk þess að geta sótt sér góða menntun. Þau fluttu því til Ohio fyrir skemmstu þar sem Robert ver öllum sínum stundum við nám og æfingar.
WGN-sjónvarpsstöðin í Ohio fjallaði um Robert og framtíðardrauma hans á dögunum. Robert stundar nám alla virka daga og að skóladegi loknum fer hann á æfingar hjá Spire-stofnuninni, sem er einskonar æfingamiðstöð fyrir unga afreksíþróttamenn. Þar spilar hann körfubolta og lyftir lóðum.
Þjálfarar Roberts segja að hann þurfi að þyngjast um 20 kíló og auka vöðvastyrk sinn. Til að það geti gerst þarf Robert að borða talsvert og sem stendur innbyrðir hann um 5.000 hitaeiningar á dag.
Robert segir sjálfur að hann dreymi um að spila í NBA-deildinni í körfubolta. Þess má geta að hæsti leikmaðurinn til að spila í NBA-deildinni var landi Roberts, Rúmeninn Gheorghe Muresan sem spilaði í deildinni á árunum 1993 til 2000. Muresan var 231 sentímetri á hæð, eins og Robert. Súdaninn Manute Bol, sem einnig lék um margra ára skeið í NBA-deildinni, var einnig 231 sentímetri á hæð.
