Við félagarnir Ágúst Orri Ágústsson og undirritaður kíktum í Ölvesvatn og nágrenni á Skagaheiðinni um helgina. Stoppuðum reyndar bara í einn sólarhring, en það var bara nóg. Þegar við komum voru nokkrir búnir að vera við veiðar um helgina en Ölvesvatnið opnaði einmitt um síðustu helgi. Þeir höfðu gert ágæta veiði og klárt að fiskurinn er byrjaður að taka á fullu.

Veðrið tók vel á móti okkur, en það verður eins og best er á kosið, stundum smá gola, úði og svo bongó blíða þess á milli, en það fór svo að kólna og hvessa um kvöldið og þegar við vöknuðum snemma á mánudagsmorgun var lítið að gera annað en að sofa aðeins lengur, svo mikið rok var úti, en við náðum samt að landa einum áður en heim var haldið þennan morguninn.

,,Við náðum að landa flottum 14 fiskum og var það bæði á flugu og beitu. Eins skrítið og það hljómar var hann einungis að taka straumflugur eins og Black ghost, Nobbler og Dýrbít. Þeir sem voru þarna á undan okkur voru að taka bleikjuna á púpur, flottar bleikjur. Urriðinn var alls ráðandi þessa helgina hjá okkur og var okkar stærsti fiskum um 4 og hálft pund, en allir voru þeir vel vænir, flestir á bilinu 2-3 pund.

Það er um að gera fyrir þá sem langar í flotta fiska og langar í ró og næði um leið að kíkja á Skagaheiðina, hún hefur sjaldan svikið veiðimann.“