Systkinin Perla Sól Sigurbrandsdóttir og Dagbjartur Sigurbrandsson úr Golfklúbbi Reykjavíkur náðu einstökum árangri í gær.

Þau fögnuðu bæði Íslandsmeistaratitlum í sínum flokkum á Íslandsmótinu í golfi á Íslandsbankamótaröðinni sem lauk í gær á Hólmsvelli í Leiru hjá Golfklúbbi Suðurnesja.

Perla Sól sigraði í flokki 14 ára og yngri í stúlknaflokki og Dagbjartur sigraði í flokki 15-16 ára í piltaflokki. Perla Sól á eftir að keppa í þessum flokki í nokkur ár til viðbótar því hún er 11 ára og verður 12 ára í lok september á þessu ári. Dagbjartur verður 16 ára í nóvember á þessu ári.

Þetta var annað árið í röð þar sem Dagbjartur fagnar þessum titli en þetta er í fyrsta sinn sem Perla Sól verður Íslandsmeistari.