Á mánudag í síðustu viku var hin 22 ára Sara Campanella stungin til bana á strætóstöð í Messina á Sikiley. Tveimur sólarhringum síðar fann lögreglan lík hinnar 22 ára Ilaria Sula í tösku í skógi í útjaðri Rómarborgar. Hennar hafði verið saknað í hálfa aðra viku.
La Repubblica segir að ítalska þjóðin sé í áfalli vegna morðanna og mótmælti fjöldi fólks á götum úti og krafðist „menningarbyltingar“.
Nú hafa 11 konur verið myrtar í landinu á þessu ári.
Mörg hundruð konur hafa verið myrtar á Ítalíu á síðustu árum. Rúmlega 100 hafa verið stungnar til bana á hverju ári frá 2022. Flest morðin eru framin af maka eða fyrrum maka.
Sara Campanella, sem lagði stund á lífefnafræði í háskólanum í Messina, var myrt af 27 ára samnemanda sínum Stefano Argentino. Hann hefur játað morðið.
Saksóknari segir að Argentino hafi ítrekað áreitt Campanella eftir að hún hóf háskólanám fyrir tveimur árum. Hún vildi ekkert hafa með hann að gera en hann lét það ekki hafa nein áhrif á sig og áreitti hana stöðugt.
Ilaria Sula, sem lagði stund á tölfræði í La Sapienza háskólanum í Róm, hvarf þann 23. mars.
Lík hennar fannst á miðvikudag í síðustu viku. Hún hafði verið stungin í hálsinn. Mark Samson, 23 ára, fyrrum unnusti hennar hefur játað að hafa myrt hana.
