Fórnarlamb árásarinnar var áttræður karlmaður, Bhim Kohli, sem var úti að viðra hundinn sinn Rocky þegar ungmennin komu að honum. Pilturinn réðst á hann með höggum og spörkum en á meðan myndaði stúlkan atburðarásina og flissaði.
Í fréttum breskra fjölmiðla kemur fram að stúlkunni, sem nú er 13 ára, hafi ekki verið hlátur í huga þegar dómari sakfelldi þau fyrir manndráp í morgun. Er stúlkan sögð hafa grátið þegar dómari sakfelldi hana fyrir aðild að manndrápinu með því að hvetja til ofbeldis. Pilturinn, sem er 15 ára, sýndi engin svipbrigði.
Saksóknarar höfðu farið fram á að ungmennin yrðu dæmd fyrir morð en niðurstaðan var manndráp sem felur í sér vægari refsingu. Það tók kviðdómendur sex klukkustundir að komast að þessari niðurstöðu.
Endanleg refsing verður kveðin upp í maímánuði en stúlkunni var sleppt lausri gegn tryggingu þar til dómur fellur en drengurinn verður áfram í haldi lögreglu.
Í dómsalnum las dóttir Kohli upp yfirlýsingu þar sem hún fór hlýjum orðum um föður sinn.
„Pabbi var 80 ára gamall. Hann var lífsförunautur móður minnar í 55 ár. Hann var kærleiksríkur faðir, afi, bróðir, frændi og náinn vinur margra,“ sagði hún meðal annars.
Dómari í málinu var ómyrkur í máli þegar hann las upp niðurstöðuna.
„Bhim Kohli var bara að gera það sem hann gerði á hverjum degi, hann fór í göngutúr með hundinn við heimili sitt. Þar var ráðist á hann af unglingspilti, sem hvattur var áfram af unglingsstúlku, og hann skilinn eftir slasaður. Í þessum réttarhöldum hefur verið sýnt fram á að þau bera ábyrgð á dauða Kohli,“ sagði hann og bætti við að um hefði verið að ræða tilefnislausa árás á saklausan mann.
Það var nágranni Kohli sem kom að honum slösuðum á götunni og var hann í kjölfarið fluttur á sjúkrahús. Hann lést af sárum sínum daginn eftir. Krufning leiddi í ljós að hann hafði orðið fyrir alvarlegum áverkum á hálsi sem drógu hann til dauða.
