Donald Trump Bandaríkjaforseti birti í dag páskakveðju til þjóðar sinnar sem mörgum þykir frekar vanstillt. Páskakveðjan birtist á samfélagsmiðli Trump, Truth Social, en þar segir:
„Gleðilega páska allir, þar með talið öfgafullu vinstribrjálæðingarnir sem eru að berjast og plotta með kjafti og klóm til að koma morðingjum, fíkniefnabarónum, hættulegum föngum, geðveikum og vel þekktum meðlimum í MS-13 genginu og heimilisofbeldisseggjum, aftur inn í landið okkar. Gleðilega páska AUMU og ÓSKILVIRKU dómarar og lögreglufulltrúar sem eru að leyfa þessari illu aðför að þjóð okkar að viðgangast, árásir sem eru svo ofbeldisfullar að þeim verður aldrei gleymt.“
Næst beindi Trump spjótum sínum að forvera sínum, Joe Biden, sem hann uppnefnir sem Syfjaða Jóa. Trump segir að Biden hafi verið vanhæfasti forsetinn í sögu Bandaríkjanna og að stefnu hans í innflytjendamálum verði minnst sem einnar verstu hörmungar sem Bandaríkin hafa látið ganga yfir sig. Eins ítrekaði Trump þá skoðun sína að Biden hafi svindlað í kosningunum árið 2020 og kallar hann fábjána.
Hann lauk svo páskakveðjunni á jákvæðari nótum.
„Ég óska ykkur öllum, með mikilli ást, einlægni og hlýju, gleðilegra páska.“
