Auðkýfingurinn Elon Musk lagði mikið á sig til að freista þess að koma í veg fyrir að Susan Crawford, sem nýtur stuðnings demókrata, yrði kjörinn dómari við hæstarétt Wisconsin. Þessi tilraun hans bar ekki árangur. Þar með verða frjálslyndir dómarar í meirihluta hæstaréttar Wisconsins næstu þrjú árin. Crawford hefur meðal annars í dómarastörfum verndað réttinn til þungunarrofs og rétt fólks til að ganga í stéttarfélög. Musk og Donald Trump Bandaríkjaforseti studdu mótframbjóðanda Crawford, Brad Schimel.

Crawford fagnaði sigrinum í gær en sagðist aldrei hafa órað fyrir því að þurfa að berjast við ríkasta mann heims. „Á uppvaxtarárum mínum í Chippewa Falls hefði mig aldrei órað fyrir því að ég þyrfti að takast á um réttlæti í Wisconsins við ríkasta mann heims eða að ég myndi sigra þann slag.“

Musk og hópar sem hann studdi fjárhagslega við eyddu hátt í þremur milljörðum í kosningabaráttuna. Musk ferðaðist meira að segja sjálfur til Wisconsin tveimur dögum fyrir kosninguna til að gefa tveimur kjósendum ávísanir upp á 136 milljónir.

„Íbúar Wisconsin hafa staðið af sér fordæmalausa árás á lýðræðið okkar, sanngjarnar kosningar og á hæstaréttinn okkar. Wisconsin reis á fætur og tilkynnti hátt og snjallt að réttlætið hefur engan verðmiða og að dómstólar okkar eru ekki til sölu.“

Kjörsókn sló öll met, en demókratar vona að þetta sé vísbending um það sem koma skal – að fólk sem er óánægt með Donald Trump og Elon Musk muni mótmæla þeim á kjörstöðum landsins.

Musk var að sjálfsögðu vonsvikinn með þessa niðurstöðu. Hann skrifaði á Twitter í gær: „Langtímablekking vinstrisins er að spilla dómsvaldinu.“

Schimel tapaði þó með reisn. Þegar hann sá að Crawford hefði sigrað viðurkenndi hann ósigur. Á kosningafundi hans urðu gestir reiðir og ein kona öskraði: Svindl, svindl. Schimel var fljótur að skjóta þá samsæriskenningu í kaf. „Nei,“ sagði hann. „Við verðum að sætta okkur við niðurstöðuna.“

Mögulega urðu afskipti Musk frekar til að tryggja sigur Crawford en til að fyrirbyggja hann. Fjölmiðlar hafa rætt við kjósendur og hafa sumir tekið fram að þeir hafi ekki einu sinni ætlað sér að kjósa en þegar þeir séu framgöngu Musk var þeim gróflega misboðið. Hér væri kominn ýtinn og frekur milljarðamæringur og vildi kaupa kosningar á sama tíma og hann er að skera niður mikið af nauðsynlegri félagslegri aðstoð bandaríska ríkisins. „Hann er að skera allt niður,“ sagði einn. „Fólk þarf á þessum hlutum, sem hann er að skera niður, að halda“