Kínverska ríkissjónvarpið segir að Bandaríkin þurfi að hætta að væla um að vera fórnalamb eftir að hafa fengið sér „ókeypis far með lest alþjóðavæðingar“. Miðillinn vísar þarna í viðbrögð Donald Trump og ríkisstjórnar hans við hefndartollum sem Kína hefur lagt á bandarískan innflutning.

Miðillinn China Daily, sem flytur fréttir á ensku og er á vegum kínverska kommúnistaflokksins, birti á dögunum leiðara þar sem Donald Trump er sakaður um að blekkja kjósendur sína með því að mála upp þá mynd að Kína svindli á Bandaríkjunum í viðskiptum. „Það er enginn að svindla á neinum. Vandinn er sá að Bandaríkin hafa eytt um efni fram áratugum saman. Þjóðin neytir meira en hún framleiðir. Þeir hafa útvistað framleiðslu sinni og fengið peninga að láni til að viðhalda hærri lífsæðum en þeir á heimtu á miðað við framleiðni. Það hefur ekki verið svindlað á þeim heldur hafa Bandaríkin tekið sér ókeypis far með lest alþjóðavæðingarinnar.“

Leiðarinn sagði enn fremur: „Bandaríkin ættu að hætta að væla yfir því að vera sjálf fórnarlamb alþjóðlegra viðskipta og þess í stað binda endi á duttlungafulla og eyðileggjandi framkomu sína.“

Talsmaður bandaríska forsetaembættisins, Karoline Leavitt, sagði í gær að boltinn væri hjá Kína hvað varðar tollastríðið. „Kína þarf að ganga til samninga við okkur. Við þurfum ekki að semja við þau. Það er enginn munur á milli Kína og annarra ríkja, fyrir utan stærðina.“

Utanríkisráðuneyti Kína var fljótt að svara fyrir sig og segir í yfirlýsingu að Bandaríkin hafi skotið fyrsta skotinu í þessu tollastríði. Kínversk yfirvöld hafi tekið skýrt fram að þetta stríð sé þeim þvert um geð, en þau óttist Bandaríkin ekki og muni svara fyrir sig.

„Ef Bandaríkin virkilega vilja leysa þennan vanda með samtali og samningaviðræðum þá ættu þau að hætta að beita þessum gífurlega þrýstingi, hætta að hóta og kúga, og tala við Kína á jafningjagrundvelli, af virðingu til hagsbóta beggja þjóða.“

Bandaríkin hafa lagt 145% tolla á kínverskan innflutning og Kína hefur lagt 125% á bandarískan innflutning. Hvíta húsið boðaði í dag frekari hækkun tolla sem gætu farið allt upp í 245%.