Morðið á honum hefur vakið mikinn óhug enda fundust líkamsleifar hans síðastliðinn sunnudag í ferðatösku við túristaborgina Santa Marta við Karabíska hafið. Í töskunni voru útlimir og höfuð og hafa líkamsleifar hans haldið áfram að finnast á víð og dreif um borgina.
Giovanni Coatti, frændi Alessandro, segir í samtali við ítalska fjölmiðla að Alessandro hafi ekki átt neina óvini og ekki verið með verðmæti á sér þegar hann hvarf síðastliðinn föstudag. Talið er að hann hafi verið í fríi í Kólumbíu þegar hann hvarf, en hann hafði áður lýst áhuga á því að setjast að í Kólumbíu.
„Hann var mjög róleg manneskja og ég er ekki sannfærður um þá kenningu að um rán hafi verið að ræða. Það sem skelfir okkar er annar möguleiki, að hann hafi orðið fyrir barðinu á líffærasmyglurum,“ segir hann og vísar til þess hvernig farið var með lík hans.
Tekið er fram í umfjöllun fjölmiðla að lögregla hafi ekki útilokað neitt en enn sem komið er hefur enginn verið handtekinn.
Bent er á það í umfjöllun ítalskra fjölmiðla að alls hafi þrettán sambærileg mál komið upp á þessu svæði undanfarin misseri, þar sem sundurlimuð lík finnast. Í hinum tólf tilvikunum voru fórnarlömbin heimamenn.
Ein kenning gengur út á að glæpasamtök, sem eru fyrirferðarmikil í fíkniefnaviðskiptum á svæðinu, hafi verið að verki og markmiðið sé að merkja sér svæði eða skapa hræðslu á meðal fólks.
