Fjölmiðlamaðurinn Jesse Watters hjá Fox-fréttastofunni er mjög upptekinn af karlmennsku og hefur meðal annars gagnrýnt karlmenn sem versla í matinn með mökum sínum og karlmenn sem borða ís á almannafæri. Að þessu sinni vakti Watters athygli fyrir að fagna tollastefnu Trump, en fjölmiðlamaðurinn telur að þannig geti Bandaríkjamenn endurheimt karlmennskuna.
Trump hafði lofað landsmönnum því að með tollum myndu fyrirtæki kjósa að opna verksmiðjur í Bandaríkjunum til að sleppa við aukakostnaðinn. Þessu muni fylgja mörg ný störf. Watters segir þetta frábæra hugmynd enda tíma til kominn að karlmenn fari aftur að vinna með höndunum. Hann segist vera á móti þeirri þróun að karlmenn séu farnir að genga í kvennastörf og hanga inni á skrifstofum frá morgni til kvölds. Watters neitar til dæmis að nota orðið flugþjónn.
„Þetta eru flugfreyjur. Þeir verða alltaf flugfreyjur. Jafnvel þó að þetta sé karlkyns flugþjónn þá kalla ég eftir sem áður: flugfreyja. Þeir svara mér þó yfirleitt ekki.“
Watters hélt áfram: „Þegar þú situr fyrir framan skjá allan daginn þá verður þú kona. Rannsóknir hafa sýnt fram á þetta. Rannsóknir hafa sýnt þetta. Ef þú ert úti að vinna, eins og við að byggja vélmenni, þá ertu innan um aðra karla. Þú ert ekki í kringum mannauðskerlingar og lögmenn sem smita þig af estrógeni.“
