Líkamsleifar níu ungmenna, sem hurfu sporlaust í suðurhluta Mexíkó á dögunum, fundust í yfirgefnum bíl í vikunni. Grunur leikur á að liðsmenn mexíkósks eiturlyfjagengis hafi numið ungmennin á brott og myrt þau.

Um var að ræða níu einstaklinga, fjórar konur og fimm karla, á aldrinum 19 til 30 ára. Fólkið var í fríi í Oaxaca þegar skyndilega hætti að heyrast frá þeim þann 27. febrúar síðastliðinn.

Í frétt Mail Online kemur fram að aðkoman hafi verið skelfileg en búið var að hluta líkin í sundur og koma þeim fyrir í skotti bifreiðarinnar. Þá var búið að höggva hendurnar af fólkinu og fundust þær í poka skammt frá.

Enginn hefur verið handtekinn í tengslum við rannsókn málsins og segjast yfirvöld ekki vita hvað varð til þess að ungmennin voru numin á brott.

Í frétt Mail Online er vísað í umfjöllun NVINoticias þar sem fram kemur að grunur leiki á að ungmennin hafi verið í slagtogi með glæpagengi sem kallast Los Zacapoaxtlas.

Morð eru mjög tíð í Mexíkó og tengjast þau oftar en ekki átökum glæpagengja. Minna hefur þó verið um slík átök í Oaxaca-héraði sem notið hefur töluverðra vinsælda meðal ferðamanna.