Ráðist var á mæðginin þann 16. október 2023. Wadee var stunginn 26 sinnum. Saksóknari sagði fyrir dómi að hatur á múslímum hafi verið ástæða árásarinnar.
Sky News segir að það hafi verið hinn 73 ára Joseph Czuba sem réðst á mæðginin. Árásin átti sér stað 9 dögum eftir hina blóðugu hryðjuverkaárás Hamas á Ísrael.
Mæðginin leigðu íbúð hjá Czuba. Hann réðst á þau með hníf með 18 cm löngu blaði og stakk þau bæði ítrekað. Hanan, móðir Wadee, sagði fyrir dómi að Czuba hafi sagt við hana: „Þú ert múslimi og verður að deyja.“
Mary Connor, fyrrum eiginkona Czuba, bar fyrir dómi að vikurnar fyrir árásina hafi Czuba fyllst sífellt meiri heift vegna stríðsins á milli Ísrael og Hamas. Áður en Hamas gerði hryðjuverkaárásina höfðu hjónin átt gott samband við mæðginin og sagði Connor að þau hafi litið á Hanan sem vin og góðan leigjanda.
Í kjölfar hryðjuverkaárásarinnar sagði Connor að Czuba hafi sagt við hana að hana að Hanan og Wadee þyrftu að flytja því vinir hennar gætu komið og unnið þeim mein.
Hún sagðist hafa sagt við hann að þau ættu þá að segja henni upp leigunni í samræmi við leigusamninginn þannig að hún hefði 30 daga til að flytja.
Hún sagði að Czuba hafi einnig rætt um yfirvofandi „árás“ og hafi tekið 1.000 dollara út úr banka af ótta við að bandaríska bankakerfið myndi hrynja.
Czuba neitaði sök en það tók kviðdóm aðeins klukkustund að komast að niðurstöðu um að hann væri sekur.
