Það er óhætt að segja að Chris Hyams, forstjóri fyrirtækisins Indeed, beiti óvenjulegri aðferð þegar kemur að atvinnuviðtölum.

Áður en það kemur að honum hafa aðrir stjórnendur fyrirtækisins yfirleitt lagt mat á reynslu og getu umsækjendanna. Þetta veitir Hyams, sem hefur verið forstjóri Indeed síðan 2019, tækifæri til að spyrja óvenjulegra og persónulegra spurninga.

„Þetta er gaman, þeim mun oftar sem ég geri þetta, þeim mun sjaldnar leita ég að sérstakri þekkingu eða reynslu. Það mikilvægasta er forvitni og aðlögunarhæfni, ekki endilega það sem þú hefur gert áður,“ segir hann að sögn CNBC.

Til að kanna hvort fólk búi yfir þessum eiginleikum, spyr hann alltaf tveggja spurninga:

1. „Hvað ert þú rosalega forvitin(n) um?“ Eða „Hverju hefur þú sérstaklega mikinn áhuga á?“
2. „Segðu mér sögu af einu skipti þar sem þú varst örugg(ur) um eitthvað og komst að því að þú hafðir algjörlega rangt fyrir þér.“

Svörin þurfa ekki að vera starfstengd. „Í raun hef ég meiri áhuga ef þau snúast ekki um vinnu,“ segir Hyams.

„Ef þú getur talað um bakstur súrdeigsbrauðs í 45 mínútur og 57 mismunandi uppskriftir, sem þú hefur prófað, tilraunir með hita og vökva . . . Þegar fólk býr yfir svo mikilli forvitni, snýst þetta bara um hverju það getur fallið fyrir,“ segir hann einnig.

Hann notar sömu aðferð til að finna starfsfólk sem getur breytt um stefnu þegar eitthvað mistekst og getur játað mistök sín. „Þeir, sem gera aldrei mistök eða játa það aldrei, verða erfiðir að vinna með af því að allir gera mistök á einhverjum tímapunkti,“ segir Hyams.

Hann notast einnig við eina reglu enn en það er að hann skoðar ekki ferilskrá umsækjenda áður en hann ræðir við þá. Hann segist gera þetta til að geta myndað sér sína eigin skoðun á þeim út frá því hvað þeir sýna honum. Að það sem hann sér á pappír, hafi ekki áhrif á hann og skoðanamyndun hans.