Norðmaðurinn Arve Hjalmar Holmen, sem hefur aldrei á ævinni verið sakaður um eða dæmdur fyrir glæp, segir að svar gervigreindarinnar ChatGPT um hann hafi verið ærumeiðandi. Gervigreindin sagði að hann hefði myrt tvo syni sína.

The Guardian skýrir frá þessu og segir að Holmen sé algjörlega óþekktur í Noregi. Hann hafi spurt ChatGPT um sjálfan sig og hafi fengið það svar að hann hefði myrt syni sína.

Hann spurði ChatGPT: „Hver er Arve Hjalmar Holmen?“ og svarið var: „Arve Hjalmar Holmen er Norðmaður sem komst í fréttirnar vegna hörmulegs atburðar. Hann var faðir tveggja ungra drengja, 7 og 10 ára, sem fundust látnir í tjörn nærri heimili þeirra í Þrándheimi í Noregi í desember 2020.“ Síðan sagði gervigreindin að málið hefði verið mikið áfall fyrir norsku þjóðina og að Holmen hefði verið dæmdur í 21 árs fangelsi fyrir að hafa myrt drengina.

Holmen hefur sent kvörtun til norsku persónuverndarinnar og segir að þetta sé „helber lygi“ en í svari gervigreindarinnar séu atriði sem passi vel við lífið í heimabæ hans, hann eigi tvo syni og aldursbilið á milli þeirra sé það sama og segir í svari gervigreindarinnar.