Áfrýjunardómstóll á Indlandi kvað nýlega upp þann dóm að það að taka um brjóst 11 ára stúlku og slíta strenginn í náttbuxum hennar væri ekki tilraun til nauðgunar. Dómurinn hefur vakið mikla reiði í landinu og hæstiréttur landsins hefur verið hvattur til að grípa inn í.

The Independent segir að Allahabad áfrýjunardómstóllinn hafi kveðið dóminn upp en málið snerist um árás á 11 ára stúlku í Uttar Pradesh 2021. Samkvæmt ákærunni, gripu tveir menn um brjóst hennar, slitu strenginn í náttbuxunum hennar og reyndu að draga hana ofan í ræsi.

Stúlkan var á gangi með móður sinni þegar mennirnir, sem þekktu fjölskylduna, buðu henni far á mótorhjóli.

Síðan réðust þeir á hana. Öskur hennar urðu henni til bjargar því vegfarendur heyrðu þau og komu henni til bjargar og flúðu mennirnir þá af vettvangi.