Eiginkona bandaríska stjórnmálamannsins Justin Eichorn hefur sótt um skilnað, örfáum dögum eftir að hann var handtekinn vegna gruns um að hafa reynt að kaupa vændi af ólögráða einstaklingi.

Hann var síðar ákærður fyrir tilraun til að tæla og þvinga ólögráða einstakling til vændis en slíkt brot getur varðað að lágmarki 10 ára fangelsi.

Justin, sem er fertugur, taldi sig vera í samskiptum við 17 ára stúlku en í raun og veru var hann í samskiptum við fulltrúa lögreglu. Hann hafði mælt sér mót við stúlkuna en þegar að því kom mætti hann lögreglumönnum sem handtóku hann. Nokkrir aðrir voru handteknir í tálbeituaðgerð lögreglu.

New York Post greinir frá því að eiginkona hans, Brittany, hafi sótt um skilnað frá honum í gær. Þau eiga saman fjögur börn.

Justin var kjörinn í öldungadeild Minnesotaríkis árið 2016 fyrir Repúblikanaflokksins en hann sagði af sér í síðustu viku eftir að þrýst hafði verið á hann um afsögn.

Til stóð að sleppa Justin úr haldi í gær á meðan mál hans er til meðferðar en það var afturkallað þegar í ljós kom að hann hafði sett sig í samband við ónefnda konu í Grand Rapids á meðan hann var í haldi.

Bað hann konuna, sem mun vera samstarfskona hans, um að fara í íbúð hans í St. Paul og sækja þar meðal annars fartölvu. Lögregla hafði hlerað símtalið en við húsleit í íbúðinni fundust meðal annars skotvopn og skotfæri.