Þegar verið er að undirbúa sig undir flugferð, er eðlilegt að beina sjónunum að farangrinum, brottfarar- og komutíma og að vera undir það búin að fara í gegnum öryggisleit. En eitt er það sem mörgum yfirsést – klæðnaðurinn.

Ferðasérfræðingurinn Mari sagði í samtali við The Express að val á fatnaði fyrir flugferð geti skipt miklu máli varðandi öryggi farþegans.

Margir velja sér fatnað út frá þægindum en Mari segir mikilvægt að huga að öryggisþættinum og bendir á að efni á borð við pólýester og nælon geti verið hættuleg ef eldur kemur upp.

„Ef eldur kemur upp í farþegarýminu eða eftir nauðlendingu, þá geta gerviefni bráðnað og brennt sig inn í húðina. Það getur líka kviknað í náttúrulegum efnum en gerviefni brenna hraðar og afleiðingarnar eru alvarlegri,“ segir hún.

Hún ráðleggur fólki því að klæðast fatnaði úr náttúrulegum efnum á borð við bómull, silki eða ull. Þessi efni eru öruggari og anda einnig betur en það getur gert ferðina enn þægilegri.

Annar fatnaður og skór geta einnig valdið vandræðum í flugferðum.

Háir hælar og inniskór geta verið til vandræða ef neyðarástand kemur upp og yfirgefa þarf flugvélina í skyndingu. Háir hælar geta einnig skemmt björgunarbúnað á borð við uppblásnar rennibrautir.

Hvít föt eru ekki öryggisógn en það er gott að hafa í huga að þau geta orðið skítug ef vélin lendir í ókyrrð og eitt og annað fer á flug í henni.

Heilgallar geta verið til trafala þegar farið er á klósettið því þar er plássið lítið og það getur verið erfitt að glíma við heilgalla þar inni.