Írönsk yfirvöld nota rafræna vöktun í auknum mæli til að fylgjast með konum á opinberum stöðum. Er þetta gert til að fylgjast með hvort þær óhlýðnist reglum klerkastjórnarinnar um að þær hylji hár sitt og líkama.

Þetta kemur fram í skýrslu frá Sameinuðu þjóðunum. Einnig kemur fram að harðlínumenn krefjist þess að refsingar verði hertar fyrir brot á þessum reglum klerkastjórnarinnar.

Í kjölfar dauða Mahsa Amini brutust mikil mótmæli út í Íran gegn kröfunum um að konur hylji hár sitt og líkama. Landsmenn mótmæla enn, en þó í minni mæli en áður, og láta hótanir um handtökur og fangelsun ekki halda aftur af sér.

Í skýrslunni kemur fram að Íranir noti rafræna vöktun í sífellt meiri mæli til að fylgjast með konum. Drónar eru notaðir til að fylgjast með opinberum stöðum. Í Amirkabir háskólanum hefur andlitsskönnum verið komið fyrir til að finna konur sem hylja ekki hár sitt.

Við helstu þjóðvegi landsins eru myndavélar einnig notaðar til að leita að konum sem fylgja ekki reglunum varðandi klæðaburð.