Sunday Times í Suður-Afríku greindi frá málinu um helgina sem varðar tíu manna hóp vísindamanna frá Suður-Afríku sem dvelur á Sanae IV-rannsóknarstöðinni.
Hópurinn er þarna við rannsóknir og samkvæmt áætlun ætti hann að dvelja á Suðurskautslandinu í tíu mánuði til viðbótar. Óvíst er þó hvort af því verði en talið er að það geti tekið um tvær vikur að komast að hópnum vegna þess hversu afskekktur hann er.
Sjá einnig: Upplausn á Suðurskautslandinu eftir að vísindamaður gekk af göflunum
Í tölvupósti eins úr hópnum kom fram að farið væri að bera á geðrænum veikindum eins úr hópnum sem hefði ráðist á samstarfsmenn sína og hótað að drepa þá. Þá var hann sakaður um að brjóta kynferðislega gegn einum úr hópnum.
„Því miður er hegðun hans orðin óútreiknanleg. Hann réðst á (X) sem er alvarlegt brot á öryggismálum vinnustaðarins og hann hótaði að drepa (X) sem hefur skapað óttablandið andrúmsloft. Ég er farinn að óttast um eigið öryggi og hugsa stöðugt um það hvort ég verði næsta fórnarlamb.“
Mail Online greinir frá því í dag að ástæðan fyrir því að starfsmaðurinn umræddi snappaði sé sú að til stóð að gera breytingar á vaktafyrirkomulagi í hópnum. Þetta virðist hafa farið mjög illa í viðkomandi starfsmann sem missti gjörsamlega stjórn á sér.
Dion George, umhverfisráðherra Suður-Afríku, sagði við fjölmiðla þar í landi um helgina að hann myndi persónulega hafa samband við hópinn og ræða við hlutaðeigandi.
„Það urðu hvöss orðaskipti sem enduðu með því að starfsmaðurinn réðst á yfirmanninn,“ sagði ráðherrann. „Það er rétt hægt að ímynda sér þessar aðstæður. Þetta er lítill vinnustaður og fólk er í mikilli nálægð við hvort annað.“
Dion bendir réttilega á aðstæður á Suðurskautslandinu geti verið erfiðar, en hópurinn er í um 4.000 kílómetra fjarlægð frá syðsta punkti Suður-Afríku. Veðurfar á Suðurskautslandinu getur verið óútreikanlegt en þar er oft vonskuveður og mjög kalt.
