Mehdi Yarrahi, íranskur söngvari, var nýlega hýddur með 74 höggum fyrir að hafa flutt lag þar sem ströngum reglum heimalands hans um klæðaburð kvenna var mótmælt.

Lögmaður hans, Zahra Minuei, staðfesti í færslu á X að Yarrahi hafi þegar tekið út refsingu sína og hafi hýðingin farið fram á skrifstofu saksóknara siðgæðislögreglunnar í Teheran.

The Independent segir að Yarrahi, sem er 42 ára, hafi verið handtekinn í ágúst 2023 og hafi dómstóll byltingarvarðarins dæmt hann í tveggja ára og átta mánaða fangelsi og til að vera hýddur 74 sinnum.

Hann afplánaði eitt ár af dómnum í fangelsi en restina í stofufangelsi með ökklaband.

Áður en að hýðingunni kom, skrifaði hann á X: „Ég er tilbúinn til að taka þessari 74 högga refsingu. Ég gagnrýni þessa ómanneskjulegu pyntingu en ég fer ekki fram á frestun.“

Hann var dæmdur fyrir að hafa gefið út „ólöglegt lag sem gekk gegn siðferðisvitund og venjum íslamska samfélagsins“. Lagið heitir „Höfuðklúturinn þinn“. Í textanum hvetur hann konur til að taka höfuðklútinn af sér og til að mótmæla reglunum um klæðaburð kvenna.