Bandarísk stjórnmál verða furðulegri með hverjum deginum. Nú hafa þingmenn repúblikana í Minnesota lagt fram frumvarp þar sem þeir leggja til að svokölluð „Trump sturlun“ (e. Trump Derangement Syndrome) verði viðurkennd sem geðsjúkdómur.
Samkvæmt frumvarpinu er Trump-sturlun skyndilegt ofsóknarbrjálæði hjá annars heilbrigðum einstaklingi, sem mætti flokka sem viðbrögð við embættisverkum Donald Trump Bandaríkjaforseta og persónu hans. Einkenni sturlunarinnar eru meðal annars sögð eftirfarandi:
Þetta er fyrsta tilraun repúblikana til að fá þetta meinta heilkenni viðurkennt, en stuðningsmenn Trump, MAGA-liðar, hafa um nokkra hríð notað þetta hugtak til að útskýra harða andstöðu við forsetann. Í þeirra huga getur ekki verið að gagnrýnin eigi rétt á sér heldur hljóta andstæðingarnir að vera veikir. Hugtakið má í raun rekja lengra aftur, eða allt til ársins 2003 þegar hægrisinnaði geðlæknirinn og dálkahöfundurinn Charles Krauthammer fór að skrifa um Bush-sturlun í tengslum við harða gagnrýni í garð George W. Bush Bandaríkjaforseta eftir innrás Bandaríkjanna í Írak.
Samkvæmt slangurorðabókinni Urban Dictionary er Trump-sturlun „geðveiki þar sem manneskja, sem hefur í raun sturlast af óvild í garð Donald Trump, er búin að missa alla skynsemi og rökhugsun.“
Fleiri hafa freistað þess að skilgreina þetta hugtak. Blaðamaðurinn Fareed Zakaria segir að sturlunin sé „hatur í garð Trump forseta sem er svo yfirþyrmandi að það hefur áhrif á dómgreind fólks“. Blaðamaðurinn Chris Cillizza segir þó að um sé að ræða hugtak sem stuðningsmenn Trump noti til að gera lítið úr gagnrýnisröddum. MAGA-liðar hlusti nefnilega ekki á gagnrýnina heldur líta á hana sem hræsni vinstrimanna. Vinstrimenn prediki um tjáningarfrelsi og umburðarlyndi en sturlist svo óskiljanlega þegar umræðan fjallar um Trump. Blaðamaðurinn Brad Stephens, sem þó telst íhaldsmaður, segir hugtakið notað af hægrihópum í hvert sinn sem einhver gagnrýnir Trump, sama úr hvaða flokki sá gagnrýnandi kemur: „Ég er skyndilega orðinn óvinsæll meðal hægrisinnaðra fyrrum aðdáenda minna- því ég hef staðið með skoðunum mínum. Það er nánast hlægilegt að vera sakaður um að glíma við eitthvað sem kallast Trump-sturlun bara því mér fannst ég knúinn til að tala gegn því að forsetinn gefi tilkynna að það sé sama siðferðislegur samhljómur milli Bandaríkjanna og Rússlands Vladimirs Pútíns.“
Aðrir blaðamenn hafa þó freistað þess að túlka hugtakið rúmt. Þar undir geti nefnilega líka fallið þeir sem fylgja Trump í svo mikilli blindi að þeir hætta að trúa því sem þeir heyra og sjá, vísindum og staðreyndum. Enn aðrir hafa bent á að hugtakið sé í raun gaslýsing. Það sé hreinlega verið að gera lítið úr gagnrýni með því að kalla fólk geðveikt.
Frumvarpið hefur nú verið lagt fram í Minnesota til að fá sturlunina formlega viðurkennda, sem hefur vakið óhug margra sem telja að hér séu þingmenn að freista þess að gera gagnrýni í garð forsetans ólöglega. Rétt er þó að taka fram að litlar líkur eru á að frumvarpið verði samþykkt þar sem demókratar eru í meirihluta í Minnseota.
