Stúlkan, Sudiksha Konanki, er nemandi við University of Pittsburgh og sást hún síðast aðfaranótt fimmtudags í síðustu viku. Var hún í svokölluðu „vorfríi“ (e. spring break) með fimm vinkonum sínum í Punta Cana þegar hún hvarf.
NBC News greindi frá því á mánudag að Konanki hafi sést á ströndinni með ungum manni þar sem þau fengu sér meðal annars sundsprett í sjónum. Þá sást hún í göngutúr með þessum sama manni á ströndinni en eftir það spurðist ekkert til hennar.
Þegar stúlkan var ekki í herberginu sínu að morgni fimmtudags tilkynntu vinkonur hennar um hvarfið og hafa yfirvöld í Dóminíska lýðveldinu meðal annars notið aðstoðar bandarískra og indverskra yfirvalda, en Konanki er indverskur ríkisborgari.
Nú þegar tæp vika er liðin frá hvarfinu hefur lögregla litlar vísbendingar fengið um hvað gerðist. Hefur ýmsum tilgátum verið varpað fram en lögregla hallast að því að um einhvers konar slys hafi verið að ræða. Hugsanlega hafi alda hrifsað hana með sér á haf út.
Í frétt CNN kemur fram að maðurinn sem Konanki sást með þessa nótt sé ekki grunaður um aðild að hvarfi hennar að svo stöddu. Viðurkenndi maðurinn að hafa farið með Konanki á ströndina og fengið sér sundsprett.
Þegar þau komu upp úr sjónum hafi honum verið óglatt og hann sofnað á strandstól á ströndinni. Hann sást svo á eftirlitsmyndavélum yfirgefa ströndina einn um klukkan 9 að morgni fimmtudags.
Umfangsmikil leit hefur farið fram síðustu daga þar sem hundar, þyrlur, drónar og leitarhópar hafa verið notaðir en engin ummerki hafa fundist um Konanki.
