Samfélagsmiðillinn X, með Elon Musk í fararbroddi, hefur höfðað mál á hendur danska leikfangaframleiðandanum Lego. Málshöfðunin beinist einnig að fleiri stórfyrirtækjum.

Ástæðan fyrir málshöfðuninni er að X telur að fyrirtækin hafi á ólögmætan hátt sniðgengið X sem auglýsingamiðil.

NPR skýrir frá þessu og segir að Lego hafi upphaflega ekki verið á listanum yfir þau fyrirtæki sem X höfðaði mál gegn en hafi bætt Lego við listann fyrir helgi.

Málshöfðuninni var upphaflega beint gegn auglýsingasambandinu World Federation af Advertisers.

Í málsgögnum kemur fram að 18 fyrirtæki hafi hætt að auglýsa á X eftir að Elon Musk keypti miðilinn 2022. Eru fyrirtækin sökuð um ólöglega sniðgöngu þegar kemur að því að auglýsa á X sem hét þá Twitter.

Fyrirtækin og samböndin sem málshöfðunin nær til eru:

World Federation of Advertisers

Mars

CVS Health Corporation

Ørsted A/S

Twitch Interactive

Nestlé

Abbott Laboratories

Colgate-Palmolive

Lego A/S

Pinterest

Tyson Foods

Shell

Fyrirtækin voru öll meðlimir í Global Alliance for Responsible Media sem er deild innan World Federation of Advertisers.