Enn á eftir að bera formleg kennsl á líkin en lögreglan hefur nú þegar tilkynnt foreldrum systranna og bróður þeirra, þau voru þríburar, um líkfundinn.
Metro bendir á að nú sé leitinni að systrunum lokið en enn sé ýmsu ósvarað varðandi hvarf þeirra.
Daginn áður en systurnar hurfu, sást til þeirra á fyrrgreindri brú. Upptökur úr eftirlitsmyndavélum sýna að þær voru með bakpoka, voru á brúnni og nærliggjandi göngustíg í um fimm mínútur og áttu ekki í samskiptum við neinn. Þær héldu síðan áfram för sinni í gegnum miðborgina og heim til sín í Charlotte Street hverfinu. Lögreglan segir að ekkert hafi komið fram sem bendi til að þær hafi yfirgefið íbúðina fyrr en skömmu áður en síðast sást til þeirra við ána.
Textaskilaboð voru send úr síma Henrietta til leigusala þeirra klukkan 02.12 þann 7. janúar. Hljóðuðu þau upp á að systurnar myndu ekki snúa aftur í íbúðina. Síminn var staðsettur nærri Victoria Bridge þegar skilaboðin voru send. Síminn aftengdist síðan farsímakerfinu og hefur ekki tengst því aftur að sögn lögreglunnar. Daginn eftir tilkynnti leigusalinn lögreglunni að hún hefði áhyggjur af systrunum og að eigur þeirra væru í íbúðinni. Lögreglan segir að systurnar hafi ekki sagt fjölskyldu sinni að þær væru á förum úr íbúðinni.
Bróðir þeirra, Jozsef, segir að þær hafi ekki látið fjölskyldu sína vita að þær væru að fara að flytja. Þær hafi ekki minnst einu orði á það í símtali við móður sína á laugardeginum áður en þær hurfu. Í samtali við BBC sagði hann að þær hafi sent leigusalanum skilaboð um að þær vildu hætta að leigja hjá henni samstundis, fjölskyldan hafi ekki haft neina vitneskju um þetta.
Nágrannar systranna segja að öskur hafi heyrst frá íbúð þeirra nóttina sem þær hurfu og hefur því verið velt upp hvort þær hafi orðið fyrir meiðslum og hvort þriðji aðili hafi verið til staðar í íbúðinni.
