Pilturinn var á BMW-bifreið sinni þegar hann náðist á 136 kílómetra hraða þar sem er 50 kílómetra hámarkshraði. Þegar búið var að taka tillit til vikmarka við mælinguna var endanlegur hraði úrskurðaður 131 kílómetri á klukkustund.
Umferðarlög í Austurríki eru býsna ströng og geta yfirvöld gert ökutæki upptæk ef ökumenn gerast sekir um ofsaakstur eins og í þessu dæmi.
Þó er það bundið ákveðnum skilyrðum og á götum þar sem hámarkshraði er 50 kílómetrar á klukkustund þurfa ökumenn að aka á meira en 130 til að lagaramminn falli undir þá, sum sé meira en 80 kílómetrum yfir leyfilegum hámarkshraða. Þar sem ökumaðurinn ungi ók 81 kílómetra yfir hámarkshraða var bíllinn gerður upptækur.
Ný og strangari umferðarlög tóku gildi í Austurríki í apríl í fyrra. Bíllinn sem um ræðir var metinn á 30 þúsund evrur, 4,2 milljónir króna, og verður hann seldur á uppboði. Þar að auki var ökumaðurinn ungi sektaður um 1.600 evrur, rúmar 220 þúsund krónur.
Í frétt Bild kemur fram að síðan nýju lögin tóku gildi hafi á annað hundrað bílar verið gerðir upptækir í Austurríki.
