Um miðja nótt spörkuðu þrír þungvopnaðir menn upp dyrunum að íbúð á fjórtándu hæð í Santiago, höfuðborg Chile, og vöktu þriggja manna fjölskyldu sem þar býr.

Heimilsfaðirinn, Ronald Ojeda, var færður á brott, aðeins í nærbuxum, fyrir framan augun á eiginkonu sinni og sex ára syni.

Þetta var í síðasta sinn sem þau sáu hann á lífi. Níu dögum síðar fannst lík hans í ferðatösku sem hafði verið fyllt með steypu. El País skýrir frá þessu.

Ronald Ojeda, sem varð 32 ára, var ekki bara einhver. Eftir misheppnaða valdaránstilraun í Venesúela, neyddist hann til að flýja til Chile þar sem hann sótti um pólitískt hæli. Nokkrum vikum fyrir morðið, stimplaði stjórn Nicolás Maduro, forseta Venesúela, hann sem föðurlandssvikara. Financial Times skýrir frá þessu.

Yfirvöld í Chile eru ekki í nokkrum vafa um að Maduro og hans fólk hafi staðið á bak við morðið sem var framið af meðlimum í hinu illræmda glæpagengi Tren de Aragua.

Í samtali við New York Times sagði Carolina Tohá, innanríkisráðherra Chile, að minnst þrír aðilar hafi játað að háttsettir venesúelskir embættismenn hafi ráðið þá til að myrða Ojeda.

Stjórnvöld í Venesúela vísa þessu algjörlega á bug.

„Allir eru hræddir“

Upptökur úr eftirlitsmyndavélum fjölbýlishússins í Santiago sýna skýrt og greinilega að Ojeda var færður á brott, aðeins í nærbuxum, af þremur mönnum í einkennisbúningi lögreglunnar.

„Það hefði verið hægt að myrða Ojeda á mun einfaldari hátt sem hefði ekki fengið eins mikla athygli. Það er ástæða fyrir því að þessi aðferð var valin – til að vekja athygli og hræða,“ sagði Carolina Tohá í samtali við New York Times.

Svo virðist sem upptökurnar hafi haft tilætlun áhrif með því að vekja ótta meðal fólks sem hefur einnig flúið einræðisstjórn Maduro. Þetta sagði Zair Mundaray, sem er landflótta Venesúelamaður en hann var áður saksóknari í heimalandinu. „Allir eru hræddir. Fólk þorir ekki að veita upplýsingar um sig sjálft, hvernig það flúði eða hvaða landi það býr nú í,“ sagði hann í samtali við New York Times.