Starfsfólki JP Morgan bankans hefur verið sagt að „finna sér aðra vinnu“ ef því líkar ekki við nýja stefnu bankans um að framvegis eigi starfsfólkið að mæta til vinnu fimm daga í viku. Sem sagt engin vinna heiman frá.

Jamie Dimon, forstjóri bankans, er sagður staðráðinn í að hætta með „vinna að heiman“ möguleikann sem var tekinn upp á tíma heimsfaraldurs kórónuveirunnar. Hefur starfsfólki verið tilkynnt að það eigi að snúa aftur til vinnu á skrifstofunni fimm daga vikunnar frá og með mars.

Mirror segir að þessum fréttum hafi ekki verið vel tekið af starfsfólki bankans í Lundúnum en þar starfa um 14.000 manns hjá bankanum.

Starfsfólkinu í skrifstofunni í Canary Wharf hefur nú verið úthlutað skrifborðsaðstöðu frá og með mars en hins vegar er ekki búið að leysa málin í höfuðstöðvunum í Victoria Embankment því þar er einfaldlega ekki pláss fyrir allt starfsfólkið í einu.