Varnarmálaráðherra Bandaríkjanna, Pete Hegseth, sagði í vikunni að það væri óraunhæft fyrir Úkraínu að ganga í Atlantshafsbandalagið, NATO, og tók fram að það sé ekki lengur forgangsmál fyrir Bandaríkin að verja öryggi Evrópu og Úkraínu. Bandaríkin þurfi að verja orku sinni í að tryggja sín eigin landamæri og koma í veg fyrir stríð við Kína. Eins hvatti hann Úkraínu og Evrópu til að gleyma hugmyndum um að endurheimta svæði sem Rússland hefur hernumið í Úkraínu, einkum Krímskagann.
Skömmu síðar tilkynnti Donald Trump Bandaríkjaforseti að hann hefði rætt við Vladimir Pútín, forseta Rússlands, í síma og þeir ætluðu að vinna saman að því að binda endi á stríðið. Trump tók undir með Hegseth að aðild að NATO væri ekki raunhæfur möguleiki fyrir Úkraínu og Bandaríkin myndu ekki styðja við aðild. Trump hefur eins látið að því liggja að NATO beri ábyrgð á stríðinu með því að færa út kvíarnar og þar með ógna landamærum Rússlands.
Nú greinir Reuters þó frá því að samkvæmt sendimanni Trump í Úkraínu, John Coale, sé ekki búið að útiloka Úkraínu frá NATO. Hann útilokaði ekki heldur að Úkraína gæti endurheimt hernumin svæði.
Reuters vísa til þess að Trump hafi undanfarna daga verið gagnrýndur fyrir að hafa svo gott sem gefist upp fyrir Rússlandi áður en nokkrar viðræður hófust. Ummæli Coale voru borin undir Trump á blaðamannafundi í Hvíta húsinu og þar sagðist hann stórlega efast um að Rússar sættu sig við inngöngu Úkraínu í NATO og í raun væri það ríkisstjórn Biden að kenna að slíkar hugmyndir séu yfir höfuð á borðinu. Biden hefði aldrei átt að leggja blessun sína á slík áform.
Hegseth virtist svo draga fyrri fullyrðingu sína til baka að hluta í gær. Hann tók fram á blaðamannafundi að ekkert hefði verið slegið út af borðinu í friðarviðræðunum. Það væri undir Trump komið að finna málamiðlanir.
Coale tók fram að formlegar friðarviðræður væru ekki hafnar og Bandaríkin væru enn að meta stöðuna og hvaða hlutverk Evrópa og Úkraína eigi að spila í viðræðunum.
Leiðtogar Evrópu höfðu eins gagnrýnt Hegseth fyrir að slá aðild að NATO og endurheimt hernuminna svæði af borðinu strax. Það sé galið að leggja til málamiðlanir, hvað þá málamiðlanirnar sem Rússar hafa barist fyrir síðan stríðið hófst, áður en viðræður hefjast. Slíkt væri ígildi uppgjafar.
Aðspurður hvort Bandaríkin væru að láta undan Rússum sagði Caole: „Sumir fóru mikinn án tilefnis en ég tel okkur ekki vera að gefa nokkuð eftir. Maður veit aldrei með Pútín og Rússa. Eru þeir að spila með okkur? Eru þeir einlægir? Svo komum við að samningaborðinu og munum átta okkur á þessu hratt.“
