Þjóðverjar hafa árum saman skorið útgjöld til varnarmála niður en nú er sá tími liðinn og útgjöldin fara vaxandi og munu gera næstu árin. Ástæðan er að Þjóðverjar ætla að vera undir það búnir að Rússum detti í hug að ráðast á Þýskaland eða önnur NATÓ-ríki.

„Ég tel ekki að við eigum í stríði en við lifum heldur ekki lengur á friðartímum,“ sagði Andre Bodemann, hershöfðingi, að sögn Sky News og Daily Express.

Fyrir árslok ætla Þjóðverjar að vera búnir að koma sex nýjum herdeildum á laggirnar. Verða 6.000 til 8.000 hermenn í hverri.

Bodemann sagðist ekki eiga von á skriðdrekaorustum í norðurhluta Þýskalands eða að rússneskir fallhlífahermenn lendi í Þýskalandi. Hins vegar verði Þjóðverjar að verja innviði á borð við hafnir, brýr og orkufyrirtæki gegn skemmdarverkum.

Frá lokum kalda stríðsins hefur verið fækkað um 40% í þýska hernum en í kjölfar innrásar Rússa í Úkraínu hefur dæmið snúist við og nú er verið að byggja herinn upp af krafti.

Nú eru 179.000 hermenn við störf en búið á að vera að fjölga þeim í 203.000 fyrir 2031.