Óhætt er að segja að innbrotsþjófurinn, sem braust inn í heimahús við Avenue Road í Camden á Englandi í byrjun desember, hafi komist í feitt. Hann komst inn um glugg á annarri hæð þegar íbúarnir voru að heiman.

Hann stal skartgripum að verðmæti sem svarar til um 1,8 milljarða íslenskra króna, Hermes Crocodile Kelly handtöskum að verðmæti 26 milljóna króna og 2,6 milljónum í reiðufé.

Metro segir að innbrotsþjófnum sé lýst sem hvítum karlmanni um þrítugt. Hann var í dökkri hettupeysu og dökkum buxum og með gráa derhúfu. Andlit hans var hulið. Innbrotið átti sér stað á milli klukkan 17 og 17.30 þann 7. desember.

Talsmaður lögreglunnar sagði að margir skartgripanna hafi mikið tilfinningalegt gildi og séu einstök hönnunarverk og því sé auðvelt að bera kennsl á þá.