Stærsti ísjaki heims, sem er um 4.000 ferkílómetrar að stærð og 1.200 metrar á hæð, stefnir nú á hina afskekktu eyju South Georgia. Hann gæti ógnað lífi milljóna mörgæsa því þær gætu átt erfitt  með að verða sér úti um fæðu ef ísjakinn kemur upp að eyjunni.

South Georgia er breskt yfirráðasvæði. Þar búa milljónir mörgæsa og sela og nokkrir vísindamenn. Ísjakinn, sem nefnist A23, brotnaði frá Suðurskautslandinu í desember og hefur rekið til norðurs síðan. Reiknað er með að hann nái til South Georgia á næstu tveimur til fjórum vikum.

Sky News segir að sérfræðingar hafi miklar áhyggjur af afdrifum dýralífs á eyjunni ef ísjakinn strandar á grunnsævi við hana, því það getur lokað mikilvægum leiðum mörgæsa þegar þær fara til fæðuöflunar.

Foreldrar gætu neyðst til að synda lengra en áður, til að komast í fæðu, og eyða þar með meiri orku sem aftur myndi leiða til þess að þeir kæmu ekki með eins mikið æti handa ungum sínum og fram að þessu.

British Antarctic Survey segir að þetta geti aukið dánartíðnina mikið hjá mörgæsum.