Eins og myndbandið ber með sér mættust tveir menn við stiga á lestarstöðinni og rákust lauslega saman. Sá sem var á leiðinni upp brást ókvæða við, dró upp hníf og elti þann sem var á leiðinni niður og stakk hann aftan í hálsinn.
Sá sem fyrir árásinni varð var augljóslega undrandi og ringlaður en hélt för sinni áfram. Maðurinn fékk aðhlynningu skömmu síðar og var fluttur á slysadeild, en í frönskum fjölmiðlum kemur fram að hending hafi ráðið því að hann dó ekki í árásinni. Maðurinn hefur verið útskrifaður af sjúkrahúsi.
Myndband af árásinni var birt í frönskum fjölmiðlum og hafði lögregla hendur í hári árásarmannsins í gærkvöldi eftir að aðstandandi mannsins bar kennsl á hann.
Hann hefur áður komið við sögu lögreglu.
