Donald Trump, sem svarinn var í embætti Bandaríkjaforseta í gær, tjáði sig stuttlega um stöðu mála í samskiptunum við Rússland á sama tíma og hann ræddi við blaðamenn og skrifaði undir hinar ýmsu forsetatilskipanir sem hann hafði lofað að gera.

Margir bíða spenntir eftir því hvað gerist í samskiptum Rússlands og Bandaríkjanna nú þegar Trump er tekinn við völdum í Hvíta húsinu, en óhætt er að segja að hann hafi verið ómyrkur í máli í garð kollega síns, Vladimír Pútín, í gær.

Trump tjáði blaðamönnum að hann ætlaði sér að ræða við Pútín á næstu dögum. Hvetur hann Rússlandsforseta til að leggja sig fram um að ná samkomulagi um lok stríðsins við Úkraínu.

„Hann ætti að semja. Ég held að hann sé að rústa Rússlandi með því að gera ekki samkomulag,“ sagði Trump og bætti við að Rússar muni lenda í vandræðum ef samningar nást ekki við Úkraínu.

Hann sagðist ætla að ræða málið við Pútín á næstu dögum, en þeir hittust á fyrra kjörtímabili Trumps í Hvíta húsinu.

„Okkur kom vel saman en ég vona að hann vilji gera samning. Hann getur ekki verið ánægður vegna þess að Rússum gengur ekki vel. Hann sýnir vissulega þrautseigju en flestir töldu að stríðinu yrði lokið á innan við viku. Og nú eru að verða komin þrjú ár, ekki satt?“

Trump fór mikinn í aðdraganda forsetakosninganna og sagði raunar að stríðið á milli Rússlands og Úkraínu hefði aldrei brotist út hefði hann verið forseti. Þá lét hann að því liggja að hann myndi stöðva hernaðaraðstoð frá Bandaríkjunum til Úkraínu og þvinga þannig Úkraínu til að semja við Rússa.