Johnson segir breska blaðinu Mirror sögu sína en hann starfaði sem vaktstjóri á næturklúbbi og lagði það í vana sinn að veipa nær stanslaust meðan á vaktinni stóð. Notaðist hann einkum við veippenna af gerðinni IVG 2400 sem entist honum aðeins í um tvo daga.
Johnson, sem er faðir ungrar stúlku, var fluttur á gjörgæsludeild eftir að hafa byrjað að kasta upp blóði skyndilega. Hann greindist með lungnabólgu í kjölfarið og röktu læknar hana til efna sem eru í umræddu veipi.
Eftir að hafa verið haldið sofandi í tvær vikur tóku við þrír mánuðir á sjúkrahúsi þar sem hann barðist meðal annars við samfallið lunga. Hann er nú á batavegi en læknar hafa varað hann við því að hann lifi ekki til fertugs ef hann heldur áfram að veipa.
Johnson vill vekja fólk – og kannski sérstaklega ungt fólk – til umhugsunar um að það getur verið stórhættulegt að veipa. Í umfjöllun Mirror er til dæmis sagt frá nýlegu andláti Hollyoaks-stjörnunnar Paul Danan sem lést 46 ára fyrr í þessum mánuði. Hann hafði áður opnað sig um lungnavandamál sín sem rekja mátti til notkunar á veipi.
„Það er svo sannarlega ekki þess virði að veipa,“ segir Johnson sem kveðst þakklátur fyrir að þetta hafi ekki gerst þegar hann var 30 eða 40 ára. Þá hefði líkami hans mögulega ekki verið í stakk búinn til að takast á við sýkinguna.
Í viðtalinu kemur fram að James hafi byrjað að veipa árið 2023. „Það komu dagar þar sem ég vann kannski í 17 tíma og ég veipaði allan tímann,“ segir hann. Það var svo í maí 2024 að hann byrjaði að kasta upp blóði en á þeim tímapunkti var hann kominn með lungnabólgu sem hélt áfram að versna.
James er nú við ágæta heilsu þó að annað lunga hans muni sennilega aldrei ná fyrri styrk.
