Fimmtán létust og að minnsta kosti 67 slösuðust þegar sprenging varð á bensínstöð í Jemen á laugardaginn. 40 af hinum slösuðu eru sagðir vera í lífshættu.

Sky News segir að bensínstöðin sé í Zaher í Bayda-héraðinu. Sprengingin varð til þess að mikill eldur braust út. Á upptökum má sjá gríðarlega mikinn eld senda mikinn svartan reyk upp í loftið.

Uppreisnarmenn Húta eru með Bayda-héraðið á sínu valdi en þeir hafa háð stríð við stjórn landsins síðan 2014.

Rúmlega 150.000 manns hafa fallið í borgarastyrjöldinni en segja má að þrátefli ríki í henni þar sem hvorugum stríðsaðilanum virðist takast að styrkja stöðu sína.