Kona er í haldi lögreglunnar í Maranhao í Brasilíu, grunuð um að hafa eitrað fyrir sjö ára dreng með því að gefa honum eitruð páskaegg. Hann var fluttur á sjúkrahús, þar sem hann lést af völdum eitrunar.

Luís Fernando, sjö ára, veiktist eftir að hafa borðað súkkulaðiegg og var fluttur á sjúkrahús í skyndi á skírdag. Hann lést nokkrum klukkustundum eftir komuna þangað.

The Independent segir að lögreglan sé að rannsaka hvort „afbrýðisöm kona“ hafi sent eggin heim til hans. Hún er í haldi lögreglunnar.

Fljótlega eftir að Luís kom á sjúkrahúsið, byrjaði móðir hans, Mirian Lira, að sýna einkenni eitrunar þegar hendur hennar urðu fjólubláar og hún átti erfitt með andardrátt. Hún og 13 ára dóttir hennar liggja þungt haldnar á sjúkrahúsi að sögn lögreglunnar.

Eggin voru send heim til fjölskyldunnar með skilaboðunum: „Ástarkveðjur til Mirian Lira. Gleðilega páska“.

Naiza Lira, systir Mirian, sagði að ekkert hafi komið fram um frá hverjum eggin voru.

Síðan hafi kona hringt í Mirian og spurt hvort hún hefði fengið eggin. Þegar hún spurði konuna hver hún væri, svaraði hún: „Þú kemst að því,“ og lagði á.

Konan, sem er í haldi, er 35 ára og er fyrrum unnusta nýs unnusta Mirian.

Hún er sögð hafa notað hárkollur þegar hún keypti eggin í stórmarkaði.