Yfirvöld í bænum Maashorst í Hollandi hafa gengist við því að 46 listaverk sem týndust eftir framkvæmdir á bæjarskrifstofunum í fyrra muni sennilega aldrei koma í leitirnar.

Mörg verðmæt listaverk héngu á veggjum byggingarinnar, þar á meðal silkiprentuð og númeruð mynd af Beatrix Hollandsdrottningu eftir bandaríska listamanninn Andy Warhol. Myndin sem um ræðir er metin á um tvær milljónir króna, að því er segir í frétt BBC.

Rannsókn hefur leitt í ljós að listaverkunum var komið fyrir í kjallara byggingarinnar og hrein og klár vanþekking hafi orðið til þess að verkunum var hent á ruslahaugana. Samanlagt verðmæti verkanna er talið hafa numið nokkrum milljónum króna.

„Svona fer maður ekki með verðmæti en þetta gerðist og mér þykir það miður,“ segir Hans van der Pas, bæjarstjóri Maashorst, í samtali við Omroep Brabant.

Verkið sem um ræðir er hluti af röð listaverka eftir Warhol sem kölluðust „Reigning Queens“ en auk Beatrix gerði hann myndir af Elísabetu II Bretlandsdrottningu, Margréti Danadrottningu og Ntfombi drottningu konungsríkisins Esvatíni.

Verkin gerði Warhol árið 1985, tveimur árum fyrir andlát sitt.